සුද්දාගේ පස්ස සේදිම

ලෝබ නැතිව වියදම් කරන කෙනෙකුට අපි කිව්වේ සුද්දා වගේ කියලා. ඇදුම් පැළඳුම් ලස්සනට ඇන්ද කෙනෙකුට අපි කිව්වෙත් සුද්දා වගේ කියලා.වෙන එකක් තියා වැඩක් ලස්සනට පිළිවෙලට කරන කෙනෙකුට අපි කිව්වෙත් සුද්දා වගේ කියලා.එහෙම කියපු අපිට දැන් සුද්දව පේන්නේ පස්සවත් හරියට හෝදන්නෙ නැති අපිරිසිදු මනුස්සයෙක් විදිහට.මට මේ ටික මේ විදිහට හිතුනේ පසු ගිය දවස්වල් තිස්ස ජනනායක විසින් ඉදිරිපත් කරලා තිබුනු සුද්දා පස්ස හෝදන්නේ නෑ කියන වීඩියෝව නැරඹුවයින් පසුවයි.

සුද්දා පස්ස හෝදන්නේ නෑ කියන නාමය යටතේ මෙම වීඩියෝව ඉදිරිපත් කර තිබුනත් ඇත්තටම මෙම වීඩියෝවෙන් ඉදිරිපත් කොට තිබුනේ ආනයනික කිරි පිටි නිෂ්පාදනය කරන ආකාරය සහ එයින් ඇතිවන ප්‍රතිවිපාක ගැනයි.කිරිපිටි නිෂ්පාදනය ගැන ඔහු කියන දේ නිවැරදි විය හැකියි.ඒ ගැන යමක් කීමට මට දැනුමක් ඇත්තේ නෑ.නමුත් තිස්ස විසින් සාකච්ඡා කරන මාතෘකාවට සුද්දාගේ වැසිකිලි යාමේ රටාවේ අදාලත්වයක් ඇත්තේ නෑ.නමුත් එහිදි ඔහු විසින් සුද්දාගේ වැසිකිලි යාමේ ක්‍රමය ඉදිරිපත් කිරීමෙන් සුද්දා අපට වඩා පහත් ජාතියක්ය යන ප්‍රතිරූපය ඇතිකිරීමට උත්සහ කරනු ලබනවා. එයින් තිස්ස බලාපොරොත්තු වන්නේ පස්සවත් නොසෝදන ජාතියක් පහත් වැඩ කිරිමට පසුබට නොවන බව නොකියා කිමටයි.මෙම උපකල්පනය එතරම් නිවැරදි වන්නේ නෑ.

සුද්දා යන වදන භාවිතා වන්නේ ඔවුන්ගේ හමේ පැහැය නිසා වුවත් හම සුදු ජපන්, අරාබි හෝ වෙනත් ජාතින්ට සුද්දා යනුවෙන් අප පවසන්නේ නෑ.සුද්දා යනු බටහිර ජාතීන්ම වේ.පොදුවේ සියළු බටහිර ජාතින්ට සුද්දා යනුවෙන් අප ඇමතුවත් රටින් රටට ඔවුන්ගේ සංස්කෘතින් වෙනස් වෙනවා.අවුරුදු දහ නවයක් පමණ ඉතාලියේ ද ඉන් පසු මේ දක්වා පසුගිය අවුරුදු තුනේම ස්කොට්ලන්තයේ ජීවත් වන මා මිතුරු සංජීව පවසන ආකාරයට ඉතාලි ජාතිකයන් වැසිකිලි යාමෙන් අනතුරුව අප මෙන්ම ජලයෙන් පිරිසිදු කර ගනු ලබනවා.නමුත් එංගලන්තයේදී සිදු වන්නේ කඩදාසියෙන් පිස ගැනිමක් පමණයි.එයින් අපට පෙනෙන්නේ සුද්දා යනුවෙන් ඔවුන් සියළු දෙනා එකම අච්චුවේ දැම්මත් ඔවුන්ගේ සිරිත් විරිත් රටින් රටට වෙනස් වන බවයි.

ආනයනික කිරිපිටි ගැන කිමට අවශ්‍ය තරම් කරුණු තියෙද්දි ඇයි තිස්ස මේකට කිසිම අදාලත්වයක් නැති සුද්දගේ පස්ස හේදිමක් ඈඳලා ගන්නේ.අපි දන්නවා බටහිර ජාතින් අපට වඩා සෑම අතින්ම ඉදිරියෙන් ඉන්න බව. එකට තිබ්බොත් ලැජ්ජා හිතෙන තරමට අපි පිටුපස්සෙන් ඉන්නේ.මේ නිසා අපි ඉන්නේ ඇත්තටම හීනමානයෙන්.ඒ නිසාම අපි හැමතිස්සෙම උත්සහ කරන්නේ මොකක් හරි දේකින් සුද්දා අපිට වඩා පල්ලෙහායින් ඉන්නේ කියලා පෙන්නන්ඩ.අපි කරන එක දෙයක් තමා වංසේ කබල් ගාන එක.ඒක ටිකක් සාර්ථකයි.මොකද අද ලෝකයේ ඉදිරියෙන් ඉන්න රටවල් ගොඩකට අපිට වාගෙ ලොකු ඉතිහාසයක් නෑ.අනිත් එක තමා ක්‍රිකට්.අපිට සුද්දව පරද්දන්ඩ පුළුවන් වෙලා තියෙන්නේ මේකෙන් විතරයි.ලංකාවේ ක්‍රිකට් මෙච්චර ජනප්‍රිය වෙන්නේ මෙන්න මේ හේතුව නිසා.අනිත් එක තමා සුද්දගේ පස්ස සේදීම ගැන කියන එක.මොකක් හරි දේකින් සුද්දා අපිට වඩා පහත් කියලා සුවයක් ලබනවා.

ලෝකයේ තියෙන විවිධ සංස්කෘතින් අතර ඇති සිරිත් විරිත් ද විවිධාකාරයි.එසේ වෙනස්කම් තිබුන පලියට එක් සංස්කෘතියක් අනෙකට වඩා උස් හෝ පහත් වෙන්නෙ නෑ.බලු මස් කැම අපට අප්‍රසන්න වුවත් බල්ලාට වඩා අපිරිසිදු යයි සිතිය හැකි ඌරව අප ආහාරයට ගන්නවා.ඌරා අපිරිසිදු සතෙක් ලෙස සලකන මුස්ලිම් ජාතිකයිනට මෙය මහත් අප්‍රසන්න දෙයක් විය හැකියි.මෙයින් අප අවබෝධ කර ගත යුතු කාරණාව තමයි සංස්කෘතික විවිධත්වය කියන කාරණය.විවිධ සංස්කෘතින් තුල ඇති සිරිත් විරිත් අපට රුචි හෝ අරුචි විය හැකිය.විවිධ සංස්කෘතින් තුල ඇති විවිධාකාර සිරිත් අපට අප්‍රසන්න වූ පළියට එම සංස්කෘතිය පහත් ලෙස සැළකිම හෝ ඒ දෙස උපහාසයෙන් බැලීම නොකල යුත්තක්.සංස්කෘතික විවිධත්වයට ගරු කිරීමට කුඩා කළ සිටම අප දරුවන් පුරුදු පුහුනු කල යුතුයි.

සෝමේ අයියා මගේ හොඳ මිතුරෙක්.ජීවත්වෙන්නේ කුරුණෑගල දිස්ත්‍රික්කයේ කෙලව‍රේම තියන මහනාන්නේරිය කියන ගමේ.මීට අවුරුදු හය හතකට පෙර අප දෙදෙනා සතුටු සාමීච්චියේ යෙදි සිටි අවස්ථාවක සුද්දාගේ පස්ස නොසේදීම ගැන සෝමේ අයියා සමග මා පවසා සිටියා.ටිකක් කල්පනා කරපු සෝමේ අයියා පවසා සිටියේ, ඒ මිනිස්සු කන කැම වල හැටියට වැසිකිලි යන විදිහ අපට වඩා වෙනස් ඇති යනුවෙනි.සෝමේ අයියාගේ උපකල්පනය කෙතරම් නිවැරදිද යන්න ගැන අවබෝධයක් මා හට නොමැති වුවත් සෝමේ අයියා ඒ දෙස බැලූ මැදහත් ස්වභාවය ඉතාම වැදගත්.තිස්සට වගේ ජනප්‍රිය වීමේ වුවමනාවක් සෝමේ අයියට නොතිබුන එක මේ මධ්‍යස්ථ භාවයට හේතු වෙන්න ඇති කියලා දැන් මට හිතෙනවා.