ජනාධිපතිවරණ ප්‍රතිඵල තුලින් මතුවන අනාගත අභියෝග

මහ වනයක් මැද දින ගණනාවක් පුරා අතරමං ව සිට යළි ගමන ආරම්භ කළ තැනටම පැමිණ ඇත.මේ බොහෝ ශ්‍රී ලාංකිකයින් එම සතුට භුක්ති විඳින අවස්ථාවයි.නමුත් මට සතුටක් දැනෙන්නේ නැත.මට දැනෙන්නේ  කණගාටුවක් පමණි..මගේ මතය වූයේ කෙසේ හෝ වනය මැදින් පාර සොයා ගත යුතු බවයි.නමුත් එය කරන්නේ කෙසේදැයි මම දැන සිටියේ නැත.ඒ නිසාම බහුතරයේ කැමැත්ත පිට යළිත් මුලටම පැමිණීමට සිදුව ඇත.

තවත් එක් ජනාධිපතිවරණයක් අවසන් වී ගෝඨාභය රාජපක්ෂ මහතා ජනාධිපති ධූරයට පත් වී ඇත.ඒ සජිත් ප්‍රේමදාස මහතාට වඩා ලක්ෂ දාහතරක වැඩි ඡන්ද ප්‍රමාණයකිනි.එය විශාල ජයග්‍රහණයකි.නමුත් මෙම විශාල ජයග්‍රහණය පිටුපස විශාල පරාජයක් ද සනිටුහන් වී තිබේ.එනම් රාජපක්ෂ මහතාට මෙරට සුළු ජාතීන්ගේ අවම විශ්වාසය හෝ දිනා ගැනීමට නොහැකි විමයි.මෙය ඉතා බරපතල ගැටළුවකි.එය එසේ වූයේ ඇයි.රාජපක්ෂ මහතාගේ ප්‍රමුඛ කාර්යයන් අතර එය සොයා බැලීමට ඉඩක් වෙන් විය යුතුය.බිඳ වැටී ඇති විශ්වාසය  නැවත දිනා ගැනීමට කටයුතු කල යුතුය.රටේ සිටින සියලුම වාර්ගිකයින්ගේ විශ්වාසය දිනා ගත නොහැකි නායකයාට සාර්ථක ජන නායකයෙක් විය නොහැක.මා හිතන ආකාරයට රටේ ඇති බරපතලම ගැටළුව වන්නේ අප බෙදුනු ජාතියක් වීමයි.එම ගැටළුවට පිළිතුරු නොසොයා අපට ඉදිරියට යා නොහැක.රටේ සිටින සියළු ජන වර්ග වල විශ්වාසය දිනා නොගන්නා නායකයා මෙම ගැටළුවට පිළිතුරු සොයන්නේ කෙසේද?අප ඉදිරියේ ඇති ලොකුම අභියෝගය එයයි.

දෙමල හා මුස්ලිම් ඡන්ද රාජපක්ෂ මහතාට නොලැබීම සම්බන්දයෙන් විවිද අපහාසාත්මක ප්‍රකාශ සමාජ මාධ්‍ය හරහා හුවමාරු වේ.නමුත් සිවාජිලිංගම් ප්‍රතික්ෂේප කළ දෙමළ ජනයා සිය ඡන්දය භාවිතා කොට ඇත්තේ සිංහල බෞද්ධ සජිත් වෙතයි.හිස්බුල්ලා ප්‍රතික්ෂේප කළ මුස්ලිම් ජනයා සිය ඡන්දය භාවිතා කර ඇත්තේ ද සිංහල බෞද්ධ සජිත් වෙතයි.මෙය අමතක වූවා ද හිතා මතා අමතක කලාද?

රාජපක්ෂ මහතා දිනා ඇත්තේ කාසියේ වාසිය පමණි.තරඟය ඇරඹෙන්නේ 18 වනදා සිටයි.තරඟයේ ජය පැරදුම තීරණය වනුයේ දහ අට වනදා සිට තරඟ කරනු ලබන ස්වභාවය අනුවයි.මෙම තරඟයේ විශේෂ ලක්ෂණය වන්නේ පිතිකරුවාට ප්‍රතිවාදී පිලේ ක්‍රීඩකයන් ද එනම් තමන්ට විරුද්ධව ඡන්දය භාවිතා කල ජනයා ද ජයග්‍රහණය කරා රැගෙන යාමට සිදු වීමයි.එසේ නොවී තමන්ට විරුද්ධව ඡන්දය භවිතා කල පිරිස දෙස වෛරයෙන් හා කෝපයෙන් කටයුතු කිරීමට ගියහොත් මෙම තරඟය කිසි දිනෙක ජයගත නොහැකි වනු ඇත.සිංහල ඡන්ද වලින් පමණක් ජයගැනීමට හැකිවිමේ සතුට ප්‍රකාශ වුවද සියළු ජනවර්ගයන්ගේ විශ්වාසය දිනා ගැනීමට නොහැකි වීම සතුටු විය හැකි කරුණක් නොව නැවත නැවතත් බුද්ධිමත්ව සිතා බැලිය යුතු කරුණකි.විශේෂයෙන්ම මෙවැනි තත්වයක් තුල රාජපක්ෂ මහතා සිංහල බෞද්ධ බලවේගයන්ගේ සිරකරුවෙකු එසේත් නැත්නම් ගොදුරක් විය හැක.මක්නිසා ද රාජපක්ෂ මහතාව ජයග්‍රහණය කර වූයේ සිංහල ජාතිවාදී බලවේගය වන බැවිනි.මෙය 1956 නැවත රඟ දැක්වීමක් ද? 

බණ්ඩාරනායක මහතා බලයට ඒමට උපයෝගී කොට ගත්තේ ද ජාතිවාදී බලවේගයයි.මැතිවරණ ව්‍යපාරය තුල කුමක් කිව හැකිව තිබුනද රටේ නායකයා බවට පත් වූ පසුව එම ජාතිවාදී බලවේගයේ අභිලාශයන් ඉටු කිරීමේ ඇත්ත හැකියාවක් අගමැති බණඩාරනායකට තිබුනේ නැත.අවසානයේ මේ දෙපාර්ශවය අතර ඇති වූ ගැටුමේ ප්‍රතිඵලයක් ලෙස බණඩාරනායක මහතාට ජීවිතයෙන් වන්දි ගෙවීමට සිදු වූ අතර සමාජයට ලොකු ලේ වන්දියක් ගෙවීමට සිදු විය.රාජපක්ෂ මහතා ජනාධිපති ධූරයට පත්විමද පනස් හයේ සිදුවීමට බෙහෙවින් සමානය.රාජපක්ෂ මහතා බලයට පත්විමට උපයෝගී කොට ගත්තේ ද ජාතිවාදී බලවේගයයි.ඔවුන්ගේ අභිලාශයන් ඉටු කිරීමට ජනාධිපතිවරයා කෙතරම් දුරට සමත් වේ ද?රටේ සියළුම පුරවැසියන්ගේ නායකයා වශයෙන් ජනාධිපතිවරයාට එය කෙතරම් දුරකට ඉටු කළ හැකි වේද?මෙම ජාතිවාදී බලවේගය විසින් රට කුමන දිශාවකට ගෙනයනු ඇත්ද?ඒ වෙනුවෙන් අපට අනාගතයේ දී කුමන වන්දියක් ගෙවීමට සිදුවනු ඇත් ද?